{{ 'fb_in_app_browser_popup.desc' | translate }} {{ 'fb_in_app_browser_popup.copy_link' | translate }}
{{ 'in_app_browser_popup.desc' | translate }}
旅行開心遊世界,行李拜拜唔見晒!
去旅行最怕就係行李失蹤,簡直慘過唔見男朋友,點解?
內衣褲、防曬、蚊怕水、電髮棒、充電器、卸妝油、化妝品、保養品⋯⋯
買又唔係,唔買又唔係,心情就好似跌咗個電話落水一樣,只想時光可以倒流。
所以,記住要做足所有安全措施,防止意外發生~
以下係玲玲姐俾大家嘅小貼士,記得自己睇完再Tag埋朋友仔啦~
第一,咪用大鎖
我玲玲姐覺得,安全真係好緊要,但如果你認為用大大把鎖去鎖住個篋就係安全嘅就錯啦!就好似用夾萬鎖住啲家當,可能仲危險過收埋喺月餅罐一樣,太顯眼反而惹人犯罪。用一個夠力,夠安全嘅密碼鎖就夠了!
第二,Claim tag咪印錯
其實Claim tag就係去寄存行李個陣,地勤姐姐幫你個篋貼上嘅長長貼紙,貼完個行李都會有一半貼返喺你張登機證上面。但其實聖人都有錯,姐姐都可能恰眼瞓,難免會打錯資料貼錯篋,所以不妨睇睇貼紙上嘅資料有冇錯!不過其實而家德國已經開始用電子標籤(eTag)啦,將來應該全球機場會陸續跟風,因為環保之餘仲大大減低印錯資料嘅風險,當然你都要有個可以顯示eTag嘅行李篋先得啦,邊個篋先有eTag?唔講啦~費事俾人話我賣廣告,自己上網搵eTag啦,不過記住格下價先,搵間平嘅買呀,分分鐘可以慳一個trip嘅錢喎,你無理由唔識揀嘅!
第三,做定記號咪調轉!
去旅行,唔小心俾個型男調轉行李,喺機場度搵返,再交換電話一齊玩,咁就好啦⋯⋯咪發夢啦!呢啲情節只會係電視劇入面出現,現實只會見到有個「條碼頭」嘅老花大叔,攞住你個篋,越走越遠,都唔知追唔追佢好⋯⋯唔想輪落到要追個阿叔,就要記住做定記號,綁行李帶又好,黐貼紙又好,總之唔好俾人認錯啦!但千祈唔好黐滿航空公司行李bar code label呀,好似李某某咁就係因為scan唔到正確bar code流浪機場㗎!
第四,用IT高科技保密措施
世界各地有唔少機場都有行李網上追蹤服務”TRACE ME”,即係喺行李篋上扣上ReboundTag或者Bag2Go等等,佢地內裡會配備一個微芯片,以方便隨時隨地睇實自己個行李。但我玲玲姐覺得除非你係斯洛登,有好多機密要保護,如果唔係都唔需要用到呢個服務~
第五,Mark緊急聯絡資料
正所謂小心駛得萬年船,但幾小心都有可能搭沉船,預先搵定所有必要嘅聯絡資料,例如航空公司嘅緊急電話、入境處、當地酒店嘅電話等等。因為當你發現自己唔見咗行李嗰種心急可能會令你手忙腳亂,要做咩都唔知。尤其係陌生國家,所以搵定緊急聯絡資料一定唔會錯!
第六,坐車要set好鬧鐘提醒自己
雖然有好多情況都係領取行李個陣唔見行李,但其實係去機場等等趕路其間,尤其是巴士或者電車入面,都好易唔見行李㗎!可能因為我哋平時唔係拎住個篋周圍走,又或者去完旅行最後一日太攰瞓醒就忘記咗。不如預先設定手機鬧鐘提醒,費事自己大頭蝦!
第七,貴重物一定跟身
雖然呢樣嘢三歲細路仔都識,但提提你都係將貴重物品放入手提行李!信用卡、貴重物、現金、passport等等都係拎住比較安心。唔見行李又唔見錢就唔係去旅行,而係去流浪了~
第八,分開行李擺放
有時兩個人去旅行為咗方便,都會盡量將行李塞晒喺一個行李篋輕裝上陣。但其實將要帶嘅行李分開兩個篋可能反而仲好!萬一唔見咗嘅話,都起碼仲有另一個。同埋上身同下身嘅衫,都一set一set咁放入篋整理,就算唔見咗都有另一套做後備呀~~
第九,最緊要買個穩陣嘅篋
俗語有話:「一分錢,一分貨」,揀男朋友最緊要有型、有內涵、夠實淨,同埋要經得起考驗,而我哋揀行李篋都係同樣道理,外邊要有型,入面要有內涵夠實用,最緊要俾到我無限安全感,所以我都係鍾意R字頭嘅篋神!同我男神一樣有外表、有內涵、有安全感,雖然貴左啲,但有五年保養,呢份就係用錢都買唔到嘅安全感!