玲玲姐旅遊專欄(二)

 

旅行雜物乜都帶,返嚟個篋就爆晒!

 

上星期玲玲姐同埋幾個閨密去旅行,有兩個姐妹好似搬屋咁,乜鬼嘢都放入篋,真係見到都眼火爆,其實有好多嘢根本無需要帶去旅行,帶嚟都係得個拎,不過都好,有咗佢哋我就帶少好多嘢!

 

旅客有好多類,有兩類比較極端︰一類係「無物一身輕」,攞住一個小包包就行遍天下嘅浪子;另一類就係「一心諗住自己係去火星長住」,恨不得塞滿乾糧、大支裝清潔用品、大量衫褲鞋襪等要用物品放入篋。如果你身邊有火星人朋友,咁就最好send俾佢地睇睇。其實為咗唔會帶漏旅行所需物品,好多人情願帶多而唔係帶得啱啱好。但咁樣就會帶多咗好多「唔等洗」嘅野!仲有機會令個篋過重而要罰錢,而以下嘅幾樣東西就更無必要放入篋~

 

第一,過多嘅化妝品或者護膚品 

雖然話世界上無醜嘅女人,只有懶嘅女人啫,但係去旅行嗰幾日,係咪都要成副裝備上陣呢?有啲姊妹去旅行就好似打仗咁,成set護膚品同化妝品都帶去旅行,重都唔緊要,最驚佢因為飛機氣壓爆樽,漏到周圍都係,粉餅撞撞下又碎晒,一打開咩心情都冇晒!其實大家可以先帶少量去,去到當地,先至買護膚品同面膜,到時既可以試新嘢,又多咗空間放其他戰利品,何樂而不為呢~

 

第二,太多嘅首飾

依家係去旅行,唔係去曬,又耳環、又頸鏈、又手鏈,真係曬到連小偷都要打劫你。如果大家想去旅行影多啲靚相,不如去旅行之前諗下要點襯,用最少嘅飾物去襯啦!

 

第三,旅遊書

其實有好多旅遊書已經有電子版,連埋電子地圖定位,已經唔使帶埋本旅遊書出門,仲可以好方便咁教埋你點行,如果你怕冇網絡,收唔到電子版,你都可以截圖,收晒喺電話慢慢睇,最緊要減輕行李負擔!

 

 

 

第四,清潔用品

如果你係訂星級酒店,真係唔使帶沐浴露、洗頭水、牙膏、牙刷甚至洗面奶,因為呢啲嘢一般酒店,同民宿都會有提供,如果唔確定,就先打個電話或者email問下酒店。

 

第五,高踭鞋

我哋平均去旅行行街嘅時間,比平時多五倍左右,平時返工都話攰嘅姊妹,去旅行居然可以著住三吋高踭鞋,返到酒店就腳酸酸,去旅行其實都係為放鬆心情同身體,大家可以考慮下著波鞋或者人字拖~

 

第六,帶食物同飲品

去旅行點解都要食返香港嘅嘢,唔試下當地美食?除咗去五星級大酒店食飯,食平啲去下餐廳仔,體驗下當地人生活,唔係更好咩?